PETATAH PETITIH
tentang
NASEHAT PERKAWINAN DAN MENGAKU ANAK
Yang Terhormat:
Datuk Rio Depati : Sebagai pucuk undang tambang, pusako, tempat undangan nan tagantung tinggi, tempat pusako nan batumbang dalam, ibarat kayu nan sabatang, batang gedang tempat basanda, dahan nan tampak tempat bergantung, daun nan rimbun tempat berteduh, buah nan lebat tempat memakan.
Jugo kepado para datuk nan memegang tampuk mas gagang kuaso, uhang nan erat dik pusako, uhang nan penuh dik lumbago.
Jugo kepado datuk-datuk sebagai pemangku anak buah, nan melepeh pagi nan mangurung petang, nan badiang dekat api, pun sebagai titin jalan ke rajo, sebagai ampat jalan ke jenang, sebagai tanggo jalan naik, sebagai jenjang jalan turun, tempat kusut nan baselesai, tempat silang kabapatut.
Jugo kepado Segalo Alim Ulama, sebagai suluh sinang dalam negeri, uhang penyampai firman dan Hadist, nan memberi tongkat di jalan licin, nan memberi suluh dijalan kelam.
Jugo kepado Tuo-tuo Tengganai, nan lah putih kepalok tanggal gigi, nan lah dulu makan garam, nan lah menempuh duka dengan sakit, nan lah menempuh senang dengan mulio.
Jugo kepado segalo nenek mamak, sebagai rimbo gedang tempat beramu, padang lepas tempat babiga, pergi tempat bertanyo, balik tempat bercerito, ibarat bukit tumpuan kabut, ibarat teluk perhimpunan kapal, sekin sekali dalam hati tamuni jugo di ujung lidah.
- Taluk paku kacang balimbing-tempurung linggang lenggokan
- Anaknyo pangku kemenakan nyo bimbing-kurung kampung dipatanggangkan.
Seterusnyo jugo kepado Dubalang Batin, panglimo nan idak tahu segan, dubalang nan idak tahu kalah, tibo musuh dari hulu, nyo lah dulu bakuto betis, tibo musuh dari hilir inyo lah dulu babenteng dado.
Jugo kepado Bujang serto gadih sebagai pausik laman nan panjang, sebagai penghuni rumah nan gedang atau jugo kepado segalo nan kecik bahu gedang, nan bingung bahu cerdik :
- Batang kandih ditepi umo-batang jelmu disawah pulai
- Bujang jo gadih banyak gunonyo-asal lah tahu badan mamakai
Pendek kato segalo nan ditampo lantai, segalo nan disungkup atap, duduk samo baimpit lutut, tegak samo basentuh bahu, nan slahik bendul ditepi, pemegang iko dengan pakai nan salahik bendul tengah pemegang larang denagn pantang, segalo nan ditampo bumi, Allah segalo nan disungkup langit tinggi, kecik nan idak disebut namo, gedang nan idak disebut gela apo sebab mako begitu:
Allahu Rabbi banyaknyo udang-Idak muat dalam kuali
Allahu Rabbi banyaknyo uhang-Idak telok menghitung lagi
Kito simpul sajo hadirin dan hadirat yang kami muliokan:
Assalamualaikum wr. Wb.
Manolah pulo ahi nan samalam iko, ahi baik katiko iluk, kito dak basuluh batang pisang, basuluh bulan dengan bintang, basaksi mato nan banyak: dimanolah aku tasuruh basarayo, dik umah nan batangganai, dik lek nan bapungko untuk menyampaikan kepado kito nan duduk baimpit lutut nan tegak basentuh bahu, sebagai uleh jari sambungan lidah, bak kudo pelejang bukit, bak sampan pelayangan, bak gajah pengangkut lado bak seligi buangan yaitu niat jo jo sangi nan takandung didalam lek nan samalam iko, didalam lek kawin diateh kerbau sikuk beras seratus seemak semanisnyo daging, nan samo-sao kito makan, darah nan samo-samo kito kacau, sesuai kato adat; hak nyawo balik ka batin, hak darah balik ka bumi, hak daging pulang ke napiak
Kalun menurut nan sebenanyo, idak dilubuk ambang jatuh, idak dirantau jalo tasihak, bukan layak dibuek judu, bukan alur dibuatk patut, apo sebab mako begitu tagesang gedang, awak bingung tagesang cerdik, kok cerdik idak balaja, kok pandai idak baguno.
-Belum lentik bak perahu- Belum landai bak dulang
-Belum cerdik bak nan tahu- Belum lah pandai bak uhang
Kareno agi ado nasi nan disebalik kerak, padang nan disabalik rimbo agi ado nan babebat bak bahau, ado nan basengat bak baung, tetapi dik aku jugo dak dapek….
Mantap
BalasHapus